Tuesday, September 20, 2016

အလုပ်သမားများ ကျွမ်းကျင်မှု မြှင့်တင်ရေး

အလုပ်သမားများ၏ ကျွမ်းကျင်မှုမြှင့်တင်ရန် လေ့ကျင့်ပညာပေးရေး အလွန်အရေးကြီးပါသည်။
အမှန်တကယ် တတ်မြောက်ကျွမ်းကျင်သော လုပ်သား (Competent Person) တွင် အရည်အသွေးသုံးရပ်ရှိ၏။
၁။ စာတွေ့သဘောတရား (Knowledge)
၂။ လက်တွေ့ ကျွမ်းကျင်မှု (Skill)
၃။ လုပ်ငန်းအပေါ် စေတနာထားမှု (Attitude) - တို့ဖြစ်၏။

ထိုအရည်အသွေးသုံးရပ်လုံးနှင့်ပြည့်စုံသည့် ကျွမ်းကျင်တတ်မြောက်သော လုပ်သားကောင်းများ ဖြစ်လာအောင် လေ့ကျင့် မွေးမြူ၍ ရပါသည်။

ဤကဲ့သို့ လေ့ကျင့်ပေးရေးအတွက် ပထမဦးဆုံး အရေးကြီးသည်မှာ မည်သည့်လုပ်သားအတွက် မည်ကဲ့သို့သော ကျွမ်းကျင်မှု များရှိရမည်ကို သတ်မှတ်ပေးရေး (National Competency Standard ရေးဆွဲချမှတ်ခြင်း) ဖြစ်၏။
ဤလုပ်ငန်းကျွမ်းကျင်မှု စံနှုန်းများအပေါ် အခြေခံပြီး သင်ရိုးညွန်းတမ်းများ ရေးဆွဲရပါမည်။ သင်ရိုးညွှန်းတမ်းများ ရေးဆွဲရာတွင် ဈေးကွက်လိုအပ်ချက်ကိုသိနိုင်ရန် လက်တွေ့နယ်ပယ်မှ လုပ်ငန်းရှင်ကြီးများ၊ အသိပညာရှင် အတတ်ပညာရှင်များထံမှ အကြံဉာဏ်များရယူကာ သင်ရိုးညွှန်းတမ်းရေးဆွဲရေးအဖွဲ့ ဖွဲ့စည်းလျက် တာဝန်ပေး ရေးဆွဲခိုင်းရပါမည်။

သင်ရိုးညွှန်းတမ်းများရေးဆွဲရန် လမ်းညွှန်ချက် ချပေးခြင်း၊ သင်တန်းကျောင်းများအား လိုင်စင်ချပေးခြင်း၊  သင်တန်းဆရာများ အား လိုင်စင်ချပေးခြင်း၊ စာမေးပွဲမှတ်တမ်းများကို စိစစ်သိမ်းဆည်းခြင်း၊ စည်းမျဉ်းစည်းကမ်း လုပ်ထုံးလုပ်နည်းများကို မလိုက် နာသည့် သင်တန်းကျောင်းများအား လိုင်စင်ရုပ်သိမ်းခြင်း၊ သင်တန်းကျောင်းများ၊ သင်တန်းဆင်းလုပ်သားများ၏ အရည် အသွေးကို အမြဲအကဲခတ်နေခြင်း စသော တာဝန်များထမ်းဆောင်ရန် အေးဂျင်စီတစ်ခု (Authority အဖွဲ့တစ်ခုကဲ့သို့) ဖွဲ့စည်း နိုင်ပါသည်/ဖွဲ့စည်းရန် လိုအပ်ပါသည်။

သင်တန်းသားများ တကယ်တတ်၊ မတတ်ဆိုသည်မှာ သင်တန်းဆရာများအပေါ် များစွာမှီတည်နေ၍ သင်တန်းဆရာများ၏ ပြောင်းလဲတိုးတက်နေသော အတတ်ပညာများအား လေ့လာနေမှုကိုလည်း မျက်ခြေမပြတ် စောင့်ကြည့်နေရပါမည်။

ထိုမျှသာမက -
ရေးဆွဲထားသည့်အတိုင်း စာတွေ့၊ လက်တွေ့ သင်ကြားပေးနိုင်သည့် သင်တန်းကျောင်းများ နှင့် သင်တန်းဆရာများကို မွေးထုတ်ကာ အရည်အချင်းစီစစ်၍ လိုင်စင်များ ချထားပေးရပါမည်။
ထိုသင်တန်းကျောင်းများ၏ သင်ကြားမှုများသည် ချမှတ်ထားသော မူဘောင်များနှင့် ကိုက်ညီ၊ မကိုက်ညီ အမြဲစောင့်ကြည့် စစ်ဆေးနေရန် လို၏။ အကယ်၍ သင်ကြားနေမှု (စာတွေ့ရော၊ လက်တွေ့ပါ)သည် ချမှတ်ထားသော စည်းမျဉ်းစည်းကမ်း၊ စံနှုန်းများနှင့် မကိုက်ညီပါက ထိုသင်တန်းကျောင်း၊ သင်တန်းဆရာများအား လိုင်စင်ပြန်သိမ်းရပါမည်။

သင်တန်းမှဆင်းလာသည့် သင်တန်းသားသည် မည်မျှတတ်မြောက်မှုရှိသည်ကိုလည်း စစ်ဆေးအကဲဖြတ်ရန် လိုပါသည်။ အကယ်၍ သင်ကြားမှုနည်းစနစ်များတွင် ချွတ်ယွင်းချက်များတွေ့ပါက မိမိတို့ချမှတ်ကျင့်သုံးနေသည့်စနစ်ကို အမြန်ဆုံး လေ့လာသုံးသပ်ကာ ပြန်လည်ပြင်ဆင်မှုများ ပြုလုပ်ရပါမည်။

လုပ်သားများအားလည်း လေ့လာသင်ယူလိုစိတ်ရှိလာအောင် နည်းမျိုးစုံဖြင့် ဆွဲဆောင်ရပါမည်။ ထိုအထဲတွင် -
Ø  မည်သည့်သင်တန်းများတက်ပြီးပါက (လုပ်သက်နှင့်ပေါင်းပြီး) အဆင့်တစ်ခုသတ်မှတ်ခြင်း၊
Ø  ထိုအဆင့်အတွက် လစာ သတ်မှတ်ပေးခြင်း၊
Ø  သတ်မှတ်ထားသော သင်တန်းများပြီးဆုံးပါက ဆုကြေးငွေတစ်ခုသတ်မှတ်ကာပေးခြင်း၊
Ø  အဆင့်မြင့်ကျွမ်းကျင်သင်တန်းများအတွက် သင်တန်းစရိတ်အချို့အ၀က်ကို အစိုးရမှ ကျခံပေးခြင်း၊
Ø  သင်တန်းတက်ရန် လိုအပ်သော အခြေခံပညာအရည်အချင်း (သင်္ချာနှင့်သိပ္ပံ) ကို ဖြည့်စွက် သင်ကြားပေးခြင်း၊
Ø  အခြားနိုင်ငံများသို့ သွားရောက်လေ့လာရန် အခွင့်အလမ်းများ ဖွင့်ပေးခြင်း - စသည်တို့ ပါဝင်ပါသည်။

အစိုးရကောလိပ်၊ သိပ္ပံ၊ တက္ကသိုလ်များတွင်လည်း ညနေပိုင်းသင်တန်း၊ အချိန်ပိုင်းသင်တန်းများဖွင့်ကာ technician များ၊ အင်ဂျင်နီယာများ စသူတို့အတွက် မွမ်းမံသင်တန်းများ ဖွင့်လှစ် သင်ကြားပေးနိုင်ပါသည်။ ဤကဲ့သို့ သင်ကြားပေးနိုင်ရန် ဆရာဆရာများအားလည်း အထူးမွမ်းမံသင်တန်းများ ဖွင့်လှစ်လေ့ကျင့်သင်ကြားပေးခြင်း၊ သက်ဆိုင်ရာ ဘာသာရပ်အလိုက် အခြားနိုင်ငံများသို့ သွားရောက်လေ့လာ သင်ကြားစေခြင်း စသည်ဖြင့် ပြုစုပျိုးထောင်ပေးရန် လိုပါသည်။

အထက်ပါလုပ်ငန်းများ အကောင်အထည်ဖော်ရန် အစိုးရမှ ရံပုံငွေတစ်ခုထားရှိကာ အကောင်အထည်ဖော်ရန် လိုပါသည်။ ထိုရံပုံငွေကို အလုပ်သမားများ ကျွမ်းကျင်မှု ဖွံ့ဖြိုးတိုးတက်ရေး ခေါင်းစဉ်အောက်မှ သုံးနိုင်ပါသည်။

ဤအစီအစဉ်ကို အလုပ်သမားဝန်ကြီးဌာန အောက်တွင် ထားရှိအကောင်အထည်ဖော်နိုင်ပါသည်။
ယခုဖွင့်လှစ်နေသော သင်တန်းကျောင်းများကို စုစည်းလျှက် စနစ်တကျဖြစ်လာအောင် ပြန်လည် ပြင်ဆင်နိုင်ပါသည်။

ထပ်မံ၍ အသေးစိတ်သိလိုလျှင် အောက်ပါပုဂ္ဂိုလ်ထံ ဆက်သွယ်နိုင်ပါသည်။

ဦးအေးငြိမ်း
Workplace Safety and Health Officer (MOM Registered)
Safety Course Developer and Trainer (ACTA Certified)
Author
Tel: (65) 9730 3027
Blog: http://www.shwenyein.blogspot.sg


ကျေးဇူးတင်ပါသည်။

No comments: