Friday, March 3, 2017

‘ပညာ’ ကို ‘ပြင်ညာ’ ဟု ဖတ်ရခြင်းအကြောင်း

တစ်ညသ၌ ကျွန်ုပ်သားကို မြန်မာစာ အဖတ်လေ့ကျင့်ခိုင်းစဉ် ‘ပညာ’ ဆိုသည့်စကားလုံး ပါလာ၏။

“စောစောအိပ်ထ ပြုကျင့်က
တွင်းပ ကိုယ်ခန္ဓာ။
ရောဂါခပ်သိမ်း ရှောင်ခွာတိမ်း
ကင်းငြိမ်း လွန်ချမ်းသာ။
ဥစ္စာဓန ပေါကြွယ်ဝ
ထွန်းပ ဉာဏ်ပညာ။”

သူက ‘ပညာ’ ကို ‘ပညာ (pa nya)’ ဟု မဖတ်ဘဲ အဘယ်ကြောင့် ‘ပြင်ညာ (pyin nya)’ ဖတ်ရသလဲဟု မေး၏။

သားက ငယ်သေးတော့ ဖေဖေရှင်းပြလည်း နားလည်မှာမဟုတ်ဘူးကွ ဆိုသည့်တိုင် ရပါတယ်။ ပြောသာပြပါ ဆိုသောကြောင့် အောက်ပါအတိုင်း ရှင်းပြ၏။

ဒီလိုကွ သားရဲ့။
ည မှာ ညကြီး နဲ့ ညလေး လို့ နှစ်မျိုးရှိသကွ။

(မှတ်ချက်။          ။ ညလေး ဆိုသည်မှာ ညီမလေးကို ပလီပြီးခေါ်ခြင်း မဟုတ်။ ညအသေးစားကလေးဟု ဆိုလိုရင်းဖြစ်၏။)

ညကြီးကိုတော့ ဟောသလို ‘ည’ လို့ရေးပြီး
ညလေးကိုတော့ ဟောသလို ‘ဉ ’ လို့ ရေးသကွ။

ညကြီးဆိုတာ ငသတ်နဲ့ ဉ  ပေါင်းထားတာကွ။ ည = င် + ဉ
ဆိုတော့ ‘ပညာ’ လို့ဆိုတဲ့စကားကို အကျယ်ချဲ့လိုက်ရင် ‘ပ+င်ဉာ’ လို့ ရသကွ။ ဆိုတော့ ဖတ်ရင် ပင်ဉာ (ပင်ညာ) လို့ ဖတ်သပေါ့ကွာ။ ဒါပေမဲ့ မြန်မာပါးစပ်ထဲရောက်သွားတော့ ပင်ညာ ကနေ ပြင်ညာ ဖြစ်သွားတော့တာပဲဟေ့။ ဟဲဟဲ ပြင်ပြီး ညာစားတဲ့သူတွေကိုပြောတာ မဟုတ်ဘူးပေါ့ကွာ။

အဲသဟာကြောင့်မို့လို့ ‘ပညာ’ ကို ‘ပြင်ညာ’ လို့ ဖတ်တယ်။
‘ဦးပညိန္ဒ’ ကျတော့ ‘ဦးပင်ညိန်ဒ - ဦးပြင်ညိန်ဒ’ လို့ ဖတ်တယ်။
‘ပညောင်ပင်’ ကိုတော့ ‘ပင်ညောင်ပင်’ လို့ ဖတ်တယ်။

စသဖြင့်ပေါ့ကွာ။ များသောအားဖြင့် ပါဠိစာပေတွေမှာ အတွေ့ရများတယ်။ ပညာကို ဘာဖြစ်လို့ ပြင်ညာလို့မရေးဘဲ ပညာ လို့ ရေးသလဲဆိုတော့ ပါဠိဘာသာကို တိုက်ရိုက်ယူသုံးထားလို့ပေါ့လကွာ။

တချို့လူတွေက ‘ဥ (အု)’ နဲ့ ‘ဉ  (ည)’ ကို သေသေချာချာ ကွဲကွဲပြားပြား နားမလည်ဘဲ ‘အစဉ်သဖြင့်’ လို့ရေးရမှာကို ‘အစဉ်သဖြင့်’၊ ‘အစီအစဉ်’ လို့ရေးရမှာကို ‘အစီအစဉ် ’ လို့ ရေးနေတာတွေ တွေ့တွေ့နေရတော့ ဖေဖေ အတော်လေး ဓာတ်ပျက်သဟေ့။

ငမ်၊ ဖေဖေပြောတာတွေ သားတစ်လုံးမှ နားမလည်ဘူး။

အေးလေကွာ၊ အခုနေ မင်းကိုပြောလို့နားလည်မှာ မဟုတ်သေးဘူး လို့ ဖေဖေ အစကတည်းက ပြောသားပဲကွ။ မင်းက အခုမှ အသက် (၁၀) နှစ်။ သူငယ်တန်းစာတောင် ကုန်အောင် မသင်ရသေးဘဲနဲ့ ဘယ့်နှာလုပ် နားလည်မတုံးကွ။ မင်း အသက် (၁၆) နှစ်ရှိမှ ဖေဖေပြန်သင်ပေးမယ်။ အခုတော့ တော်ရောပေါ့ကွာ။

ကျေးဇူးတင်ပါသည်။

အေးငြိမ်း

၁ မတ်လ၊ ၂၀၁၇ ။ ည ၉း၂၅ နာရီ


No comments: